Omdat it kin

Der sille doarpen wêze dêr’tst feilich skûlje kinst  
foar’t de wrâld yn flammen opgiet 
Doarpen dêr’tst  waarme tee út kokosnuten drinkst 
en dêr’tst margriten struist om lânminen op te romjen 
Sokke doarpen sille der wêze 
 
Der sille doarpen wêze dêr’t de hoanne op de toer 
it liet fan de lyster sjongt en yn de tsjerke 
de fijannen fersideboartsje 
 
Der sille doarpen wêze dêr’t ik mysels wêze kin 
om’t ik brún bin, en do wyt, homo en hetero, folslein mysels 
dêr’t minsken gjin ferskil sjogge tusken dyn krollen 
en myn blonde hier. Mei elkenien ferbûn 
 
Yn dy doarpen wol ik wenje, feestfiere, dûnsje en laitsje 
ek al is it let, hawwe de kafees de doarren sluten 
en binne de flessen leech 
 
Der sille doarpen wêze dêr’t we de eangst bedobje 
en dêr’t we grêven iepenje, freonskip rom paad jouwe 
en hân yn hân de leafde fiere mei sjampanje 
Yn sa’n doarp wol ik wenje, wol ik wêze wa’t ik bin 
wol ik de leafde libje  
 
omdat it kin  





Publisearre yn Fersefariaasje edysje 2023