It pikehok

It pikehok

troch: Sigrid Kingma

By buorman yn it pikehok
dêr kenne se gjin rêst en frede
it is dêr altyd o sa drok
elk falt de oare yn ‘e rede
De hinnen lizze echt gjin aaien
want ja, de nêstkast is sa goar
wyfkes leare ek al kraaien
se ha de pik wer op mekoar
By it fuorjen wurdt der slein
fearren misse út de sturt
froulju fjochtsje sûnder ein
alle dagen hurd tsjin hurd
En as it dalik tsjuster is
dan gunt net ien in oar in plak
op ‘e stôk giet it gau mis
mei sáfolle ûnder ien dak
It is ûnder dy fearren kâld
al dy striid, is dat no winsklik?
Is dan dochs de pikewrâld
net ek in bytsje minsklik?
net earder publisearre