Us pake Jan kocht lêstendeis
in nagelnije fyts.
Hy soe der wakker mei op reis
nei Ljouwert en Parys.
‘In proefrit is in goeie test, ’
sei pake Jan tsjin ús,
‘dy akku docht it superbest
en ik bin sa wer thús.’
Der stode pake as in spear
de holle op it stjoer.
Wy seagen him al hast net mear.
It slydjage der oer.
Mar yn ‘e bocht gong er om lyk
hy fleach er himsels foarby,
kaam hurd te lâne op ‘e dyk,
bleau lizzen dêr ’t er lei.
No sit er mei de foet omheech
achter it finsterrút.
De fyts stiet stikken yn ‘e steech
en komt der net wer út.
Dus komme wy mei in idee,
der giet ús neat te mâl.
Wy helje by ús neef Renee
de e-bakfyts fan stâl.
Dêr sit ús pake Jan no yn
de minsken wuifje blier.
Sa hat dy gipsfoet elkenien
in dizze buurt yn ’t spier!
